阮今年 ê 活動有生態觀察課程、電子譀鏡實作、美國手語配台語唱跳囡仔歌、拍通關、運動會、園遊會、講古。囡仔 m̄-nā 是 leh 學台語，koh「變身」成做「工蜂」去外口 tshuē 圖卡頂面 ê 物用電子譀鏡來觀察、挑戰「台灣動物關主」所派 ê 任務來拍通關、學台語 sîn-suà 學美國手語、來園遊會體驗台灣夜市仔 ê 各項擔仔、來運動會 mā 是浸 tī 台語內面講「準備好--ah--buē？」、「好--ah！」、「鉸刀、石頭、紙！」家長說囡仔耍甲足歡喜，已經講明年閣欲參加；毋但佇車頂直直唱營隊學到 ê 台語囡仔歌，而且轉去厝裡閣要求大人愛講台語！聽著遮 ê 話，誠實予阮真感動。
繪本閱讀
為配合生態的主題，阮特別揀佮自然環境、台灣本土動植物、氣候有關的繪本來講古予囡仔聽。
體育趣味競賽
阮佇設計台語兒童夏令營時，第一想--tio̍h--ê，就是欲按怎予袂曉講台語 ê 囡仔嘛感覺真心適佮好耍。趣味 ê 體育活動就是一个真好 ê 方式。阮耍 ê 遊戲有傳圓箍仔、圓碟過磅空、色水摸看覓、鉸刀石頭紙過關。佇耍 ê 過程，囡仔那學語詞那耍，ㄧ時仔就學著幾若个名詞--ah。
音樂律動
這改 ê 夏令營阮揀兩條囡仔歌來予囡仔學。第一條是公視台語台出版的《起床囉》。因為足濟囡仔有來上阮 ê 台語課，已經會曉念台羅矣，所以阮佇課程 ê 設計上會先請囡仔來念台文。其他第一擺接觸台語的囡仔嘛免緊張，阮 ê 教材有囥真濟圖，阮希望囡仔會使那聽台語，那看圖來理解（較大漢 ê 囡仔嘛會使家己看英文參圖來理解）。逐家做伙念了後，老師就教 in 美國 ê 手語來做動作，一擺學兩種物件，這嘛是阮發現對佇美國大漢 ê 台灣囡仔，另外一種幫助 in 學台語 ê 方式，目前 ê 效果真好，囡仔攏學 tiō 真緊。
大地遊戲
今年 ê 夏令營阮用「生態教育」設計一个主題活動，阮總共設計三節課：「蜂 ê 世界：蜂 ê 生命週期，蜂對人類 ê 重要性」、「虎頭蜂：本土種、外來種 ê 概念」、「蜂來做工：咱生活四周圍 ê 植物」。囡仔學着遮 ê 知識了後，in 就開始變做「蜂」來實作：對蜂囝開始，變做蜂蝦，閣來食蜂蜜（阮予囡仔食真的蜂蜜條honey stick）變成工蜂。工蜂愛開始出去外口 ê 世界收集花粉，囡仔愛提譀鏡（hàm-kiànn，電子放大鏡）去外口揣指定 ê 植物，去觀察植物、翕相來完成任務，按呢才會使得到花粉。得到花粉了後，in 嘛愛決定欲共花粉用來起蜂岫（phang-siū，蜂巢）、抑是欲生蜂囝。佇這个過程當中，會有「虎頭蜂」出來攪擾 in 做工課，in 就愛團結起來拍敗虎頭蜂、保護 in ê 岫。
拍通關（闖關遊戲）
拍通關一直是囡仔真佮意 ê 遊戲，阮一開始先讀《雲豹的屋頂》予囡仔聽，然後所有的囡仔都變做麒麟鹿，需要根據線索揣著雲豹 ê 五位好朋友：臺灣黑熊、長尾山娘、水鹿仔、鯪鯉佮台灣猴山仔，並且愛完成五位好朋友關主所指派 ê 任務，才有法度揣著雲豹。囡仔佇拍通關 ê 過程，那耍那學著台灣本土動物 ê 智識。
園遊會
上尾工阮準備真濟擔仔，有串珠仔、囡仔耍、植物捶印、蚵仔殼藝術、雞卵糕、tshuah 冰、撈魚仔、麻雀賓果、踅墨賊仔、十八骰仔等等，囡仔愛用 in 講台語趁著 ê 點數來參加；也就是講，in 佇營隊 ê 時，若是講愈濟 ê 台語，就會趁著愈濟 ê 點數，按呢就會使佇園遊會 ê 時，耍愈濟 ê 擔仔、買愈濟 ê 物件來食！
結業式
營隊上尾一項活動就是邀請西雅圖華僑文教服務中心王偉讚主任、佮西雅圖台灣聯合長老教會簡旭岳長老來頒發結業證書予參加營隊 ê 囡仔。
老師紹介蜂ê生命週期
囡仔認真學習台語囡仔歌
